آغلې عزیزه مومند یوه افغانه متشبثه، ټولنیزه او اقتصادي فعاله، او لارښوونکې ده چې د ښوونې، د ښځو د پیاوړتیا، سوداګرۍ او بشردوستانه فعالیتونو په برخو کې له څلورو لسیزو څخه زیات تجربه لري. هغې د اوکراین د کیف ښار د ښوونې او روزنې او بهرنیو ژبو له پوهنتونه (۱۹۸۳) کې د روسي ژبې او ادبیاتو او ټولنیزو علومو په برخه کې د ماسټرۍ سند ترلاسه کړی دی. هغې خپله لومړنۍ مسلکي دنده د ښوونې او روزنې په پوهنتون کې، چې پخوا د کابل پداګوژیک انستیتوت په نوم یادېده، پیل کړه او وروسته یې د تدریس، لارښوونې او د ځوانانو د مسلکي ودې په برخه کې خپل فعالیت ته دوام ورکړ. هغې د سازمانونو او سوداګریزو بنسټونو په رهبرۍ کې پراخه تجربه لري او د څو مهمو بنسټونو بنسټګره او مشره ده، لکه د سوداګریزو ښځو کاروان، د افغان ښځو د لاسي صنايعو بنسټ، د طوبی او بابِ مسکا د څرمنو تولید شرکت، او همدارنګه د مسکا بشردوستانه مرستندویه موسسه. عزیزه همدارنګه د څو ادارو د رهبرۍ په پلاوو کې د غړې په توګه دنده ترسره کړې ده، لکه د ښځو د سوداګرۍ عالي شورا، د سوداګرو ښځو اتحادیه، د افغانستان د ښځو د سوداګرۍ او صنايعو خونې (AWCCI) د رهبرۍ پلاوی، او د افغان ښځو د سوداګرۍ فدراسیون (AWBF). هغې د افغانستان په اقتصاد او سوداګرۍ کې د ښځو د مقام د پیاوړتیا په برخه کې اغېزناک رول لوبولی دی. عزیزه مومند د خپلو اقتصادي او ټولنیزو فعالیتونو له امله په ملي او نړیواله کچه ګڼ شمېر لاسته راوړنې لري او سلګونه ستاینلیکونه، تصدیق‌لیکونه او جایزې یې ترلاسه کړې دي.